Moin, moin. Hartlich willkamen op de Homepage vun de Speelkoppel Dötlingen.

De neege Theatersaison geiht nu bald los. Siet Juli sünd wi al duchtig an’t öven. Use Stuck dit Johr heet „Keerls sünd ok blots Minschen“. Dat turbulente Lustspeel hannelt vun dat Ehepoor Hannes un Linda Lürsen, de sik över de Johre utnanner leevt hebbt. Vör allem Linda liedt ünner den Umstand, een arbeitswütigen Keerl to hebben, de avends in de Wohnung kümmt, de Hushollersche küsst un sien Fro Hoot un Mantel gifft, ahn dat he dat Versehn markt. De Reakschoon vun siene Fro: se quartiert sik bi ehre Naaversche in. Aver nich ahn ehre Hushollersche den Opdrag to geven, Ogen un Ohren optosparren, wat ehr Keerl so maakt. Hannes sien Fründ gifft em den Raat, dör Kontaktanzeigen annere Froens kennentolehren, um ruttokriegen, op wat Froens so affohren doot. Aver dormit fangt Hannes siene Probleme eerst an. Todem maakt em de unverwachtenen Besöken vun sien Broder un siene Chefin to schaffen.

Kiekt jo an, wat dorbi rutkümmt, wenn man sik op Kontaktanzeigen mellt un nich weet, wat op een tokümmt.

De Termine för de Saison seht ji ünnen op düsse Siet.

In de Rubrik „Speelde Stücken“ find ji noch eene Översicht över de letzten Stücken mit eene koorte Beschrievung vun de Handlung un een Bild. Wenn ji dor anklickt, köönt ji noch mehr Billers ankieken.

Joe Speelkoppel Dötlingen